ನಾಲ್ಕು ದಶಕಗಳ ಕಾಲ ಸಮಾಜಕ್ಕಾಗಿ ಮಿಡಿದ- ದುಡಿದ ಮಂಜುನಾಥ ಪೂಜಾರಿ ಅವರಿಗೆ ಕಾಂಗ್ರೆಸ್ ಸರ್ಕಾರ ನಾರಾಯಣ ಗುರು ನಿಗಮದ ಅಧ್ಯಕ್ಷರನ್ನಾಗಿ ನೇಮಿಸುವ ಮೂಲಕ ಗೌರವ ಸಲ್ಲಿಸಿದೆ

ಪಕ್ಷ ಸಿದ್ಧಾಂತಕ್ಕಾಗಿ ಎದೆಗೆ ಎದೆ ಕೊಟ್ಟು ಹೋರಾಡುವ, ಸತ್ಯ ನ್ಯಾಯದ ವಿಚಾರ ಬಂದಾಗ ಎದುರಾಳಿ ಪಕ್ಷ, ಜಾತಿ ಮತ ನೋಡದೆ ಸಹಾಯ ಹಸ್ತ ಚಾಚುವ ಅಪ್ಪಟ ಕಾಂಗ್ರೆಸ್ಸಿಗ ಮಂಜುನಾಥ್ ಪೂಜಾರಿ ಮುದ್ರಾಡಿ.

ಯುವ ಕಾಂಗ್ರೆಸ್ ಮೂಲಕ ಸಮಾಜಸೇವೆ, ರಾಜಕೀಯ ಪ್ರವೇಶ ಮಾಡಿದ ಮಂಜುನಾಥ ಪೂಜಾರಿ ಅವರು ಮುದ್ರಾಡಿ ಗ್ರಾಮ ಪಂಚಾಯತಿ ಸದಸ್ಯರಾಗಿ, ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದರು. ಬಳಿಕ ಜಿಲ್ಲಾ ಪಂಚಾಯತಿ ಸದಸ್ಯರಾಗಿದ್ದರು.

ವೀರೇಂದ್ರ ಪಾಟೀಲ್ ಅವರ ಸರ್ಕಾರದ ದಿನಗಳವು. ಮೂರ್ತೆದಾರಿಕೆಯನ್ನು ನಿಷೇಧಿಸಿ ಆದೇಶ ಹೊರಡಿಸಿತು. ಹದಿಹರೆಯದ ಮಂಜುನಾಥ ಪೂಜಾರಿಯವರು ನಿಷೇಧದ ವಿರುದ್ಧ ಹೋರಾಟ ಸಂಘಟಿಸಿದರು. ಹೆಬ್ರಿ, ಕಾರ್ಕಳ, ಉಡುಪಿ ದಾಟಿ ಮಂಗಳೂರು ವರೆಗೂ ಹೋರಾಟ ವಿಸ್ತರಿಸಿತು. ಕೊನೆಗೆ ಇವರೆಲ್ಲರ ಸಾಮೂಹಿಕ ಹೋರಾಟಕ್ಕೆ ಸರಕಾರ ನಿಷೇಧವನ್ನು ಹಿಂದೆ ತೆಗೆದುಕೊಂಡಿತು. ಹೀಗೆ ಜನರ ನಡುವೆ ಇದ್ದು ಜನಪ್ರೀತಿಯಿಂದಲೇ ಗ್ರಾಮ ಪಂಚಾಯತ್ ಅಧ್ಯಕ್ಷರಾಗಿ ಜಿಲ್ಲಾ ಪಂಚಾಯತ್ ಸದಸ್ಯರಾಗಿ ಸತತವಾಗಿ ಗೆದ್ದು ಬಂದರು.

ಹುಲಿ ಯೋಜನೆ ಇರಲಿ ಡಿಮ್ಡ್ ಫಾರೆಸ್ಟ್ ಯೋಜನೆಯ ಬರಲಿ ಜನರಿಗೆ ಸಮಸ್ಯೆ ಆದಾಗ ಅವರ ಪರವಾಗಿ ಹೋರಾಟ ನಡೆಸುವ ಮಂಜುನಾಥ ಪೂಜಾರಿಯವರು ಇನ್ನೊಂದು ಕಡೆಯಿಂದ ಗಣೇಶೋತ್ಸವ ದಸರಾ ಸಾರ್ವಜನಿಕ ಉತ್ಸವಗಳನ್ನ ಸಂಘಟಿಸಿದರು. ದೈವಸ್ಥಾನಗಳ, ದೇವಸ್ಥಾನಗಳ ಜೀರ್ಣೋದ್ಧಾರಗಳಲ್ಲಿಯೂ ಮುಂಚೂಣಿಯಲ್ಲಿದ್ದು ಊರಿನ ಶ್ರೇಯೋಭಿವೃದ್ಧಿಗೆ ಟೊಂಕ ಕಟ್ಟಿದವರು.

ಮಕ್ಕಳ ಶಿಕ್ಷಣಕ್ಕೆ ಸ್ಕಾಲರ್ಶಿಪ್ ಮಕ್ಕಳ ಸಾಂಸ್ಕೃತಿ ಕಾರ್ಯಕ್ರಮ ಗಳಿಗೆ ಪ್ರೋತ್ಸಾಹ ನೀಡುವ ಮಂಜಣ್ಣ, ಕೊರೊನಾ ಕಾಲದಲ್ಲಿ ಅಂತೂ ಚಾಲಕ ವರ್ಗದವರಿಗೆ ದುಡಿಯೋ ವರ್ಗದವರಿಗೆ ಹುಡುಕಿ ಹುಡುಕಿ ಆಹಾರ ಕಿಟ್ ನೀಡಿ ಹೃದಯ ವೈಶಾಲ್ಯ ಮೆರೆದವರು.

ಹೆಬ್ರಿ ತಾಲೂಕು ಹೋರಾಟದ ಸಂದರ್ಭ ಕೊನೆಯ ಹಂತದಲ್ಲಿ ವೀರಪ್ಪ ಮೊಯ್ಲಿ ಅವರ ಬಳಿ ಹೋದ ಸಂದರ್ಭ ತಾಲೂಕು ಘೋಷಣೆ ಮಾಡದೇ ಇದ್ರೆ ವಾಪಾಸ್ ಹೆಬ್ರಿಗೆ ಕಾಲಿಡುವುದಿಲ್ಲ ಎಂದು ಪೂಜಾರಿಯವರು ಒಂದು ರೀತಿಯಲ್ಲಿ ಬೆದರಿಕೆಯನ್ನೇ ಹಾಕಿದ್ದರು. ಆಗ ಮೊಯ್ಲಿಯವರು ನಾನು ಹೆಬ್ರಿ ತಾಲೂಕು ಘೋಷಣೆಯಾಗಿಯೇ ಹೆಬ್ರಿಗೆ ಬರುವುದು ಎಂದು ಹೇಳಿದರು. ಆದರೆ ವೀರಪ್ಪ ಮೊಯ್ಲಿ ಕೊಟ್ಟ ಮಾತು ತಪ್ಪಲಿಲ್ಲ ಅವರ ಪ್ರಭಾವದಿಂದ ತಾಲೂಕು ಕೆಲವೇ ದಿನಗಳಲ್ಲಿ ಘೋಷಣೆಯು ಆಯ್ತು. ಇವರ ಇಷ್ಟೆಲ್ಲ ಸೇವೆಗಳಿಗೆ ಖಂಡಿತ ಕಾಂಗ್ರೆಸ್ ಪಕ್ಷ ಕಣ್ಣು ಮುಚ್ಚಿ ಟಿಕೆಟ್ ನೀಡಬಹುದಿತ್ತು.

ಇವರ ಗುರು ವೀರಪ್ಪ ಮೊಯಿಲಿಯವರ ಶಿಫಾರಸು ಅಭಯಹಸ್ತ ಇದ್ದರೂ ಕೂಡ ಇವರ ಅದೃಷ್ಟ ಚೆನ್ನಾಗಿರಲಿಲ್ಲ. ಟಿಕೆಟ್ ಕೈಗೆ ಬರುತ್ತದೆ ಎನ್ನುವಾಗ ಜಾರಿ ಹೋಗಿತ್ತು. ಟಿಕೆಟ್ ಸಿಗದೇ ಇದ್ದಾಗ ಬೇಸರಿಸಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಹುದ್ದೆಗೆ ರಾಜೀನಾಮೆ ಕೊಡ ನೀಡಿದ್ದರು. ಹೃದಯವಂತರು ಕೂಡ ಹಾಗೆ ಖುಷಿಯಾದಾಗ ಸಂಭ್ರಮಿಸುತ್ತಾರೆ ನೋವಾದಾಗ ತೋರಿಸಿಕೊಳ್ಳುತ್ತಾರೆ ಆದರೆ ದ್ರೋಹವಂತೂ ಮಾಡುವುದಿಲ್ಲ.

ಪಕ್ಷ ಸಂಘಟನೆಯ ಜೊತೆ ಮುದ್ರಾಡಿಯಲ್ಲಿ ಶ್ರೀ ಗುರುರಕ್ಷಾ ಚಾರಿಟೇಬಲ್ ಟ್ರಸ್ಟ್ ಮತ್ತು ಶ್ರೀ ಗುರುರಕ್ಷಾ ಸೌಹಾರ್ದ ಸಹಕಾರಿ ಸಂಘವನ್ನು ಸ್ಥಾಪಿಸಿ ಜನಸೇವೆ ನಡೆಸುತ್ತಿದ್ದಾರೆ. ಇವರು ಹಣದ ಹಿಂದೆ ಹೋದವರಲ್ಲ. ಹೀಗಾಗಿ ಸೇವೆ ಮಾಡುವಂತಹ ಅವಕಾಶ ಇರುವ ಶ್ರೀ ನಾರಾಯಣಗುರು ನಿಗಮ ಅಧ್ಯಕ್ಷ ಹುದ್ದೆ ಲಭಿಸಿದೆ.

ಪಿ ಮೊಯಿಲಿ
(ಸಂಗ್ರಹ)

Share